Plen d’aigo per la peiro e tampouna d’erbiho
    Lou coufie sus l’anco pendiho. 
  Si la peiro es au fres dins soun estui de bos,
    E se de longo es abeurado,
  L’Ome barbelo au fio d’aqueli souleiado
  Que fan bouli de fes la mesoulo dis os.

  Tu, Cigalo, as un biais per la set:  dins la rusco
    Tendro e jutouso d’uno busco,
  L’aguio de toun be cabusso e cavo un pous. 
    Lou siro monto per la draio. 
  T’amourres a la fon melicouso que raio,
  E dou sourgent sucra beves lou teta-dous.

  Mai pas toujour en pas.  Oh! que nani; de laire,
    Vesin, vesino o barrulaire,
  T’an vist cava lou pous.  An set; venon, doulent,
    Te prene un degout per si tasso. 
  Mesfiso-te, ma bello:  aqueli curo-biasso,
  Umble d’abord, soun leu de gusas insoulent.

  Quiston un chicouloun di ren, piei de ti resto
    Soun plus countent, ausson la testo
  E volon tout:  L’auran.  Sis arpioun en rasteu
    Te gatihoun lou bout de l’alo. 
  Sus tu larjo esquinasso es un mounto-davalo;
  T’aganton per lou be, li bano, lis arteu;

  Tiron d’eici, d’eila.  L’impacienci te gagno. 
    Pst! pst! d’un giscle de pissagno
  Asperges l’assemblado e quites lou rameu. 
    T’en vas ben liuen de la racaio,
  Que t’a rauba lou pous, e ris, e se gougaio,
  E se lipo li brego enviscado de meu.

  Or d’aqueli boumian abeura sens fatigo,
    Lou mai tihous es la fournigo. 
  Mousco, cabrian, guespo e tavan embana,
    Espeloufi de touto meno,
  Costo-en-long qu’a toun pous lou soulcias ameno,
  N’an pas soun testardige a te faire enana.

Per l’esquicha l’arteu, te coutiga lou mourre,
Te pessuga lou nas, per courre
A l’oumbro du toun ventre, osco! degun la vau. 
Lou marrit-peu prend per escalo
Uno patto e te monto, ardido, sus lis alo,
E s’espasso, insoulento, e vai d’amont, d’avau.

II.

Aro veici qu’es pas de creire. 
Ancian tems, nous dison li reire,
Un jour d’iver; la fam te prengue.  Lou front bas
E d’escoundoun aneres veire,
Dins si grand magasin, la fournigo, eilabas.

L’endrudido au souleu secavo,
Avans de lis escoundre en cavo,
Si blad qu’avie mousi l’eigagno de la niue. 
Quand eron lest lis ensacavo. 
Tu survenes alor, eme de plour is iue.

    Ie dises:  “Fai ben fre; l’aurasso
    D’un caire a l’autre me tirasso
  Avanido de fam.  A toun riche mouloun
    Leisso-me prene per ma biasso. 
  Te lou rendrai segur au beu tems di meloun.

    “Presto-me un pan de gran.”  Mai, bouto,
    Se creses que l’autro t’escouto,
  T’enganes.  Di gros sa, ren de ren sara tieu. 
    “Vai-t’en plus liuen rascla de bouto;
  Crebo de fam l’iver, tu que cantes l’estieu.”

    Ansin charro la fablo antico
    Per nous counseia la pratico
  Di sarro-piastro, urous de nousa li cordoun
    De si bourso.—­Que la coulico
  Rousigue la tripaio en aqueli coudoun!