[Footnote B:  Illegible in the record.]

Collas Rougier depose que son frere Piere Rougier en mourant chargeoit Collas Becquet de sa mort.

Collas Hugues raport qu’estant en une nopsce y survint Collas Becquet jouet avec sa belle-fille, laquelle le rebouta; et des le mesme soir elle fut frapee de telle facon qu’on pensoit qu’elle mourust a chacune heure; qu’elle est demeuree mechaignee de coste, et trouva un des sorcerots en son lict, qui pour lors furent monstres a Messrs de Justice qui estoyent a tenir des veues a St. Pierre; que la djte fille tomboit quelque fois y terre toute aveuglee.

La femme du djt Hugues depose tout de mesme que son mary.

Jean De Garis, fils Guillaume, depose qu’il y a viron deux ou trois ans qu’ayant preste quelque argent sur un gage a Collas Becquet, luy demandant son argent, ou qu’il feroit ventiller son gage; luy repartit le djt Becquet a feray donc ventiller autre chose; qu’estant le djt de Garis arive en sa maison, trouva la fille malade et affligee; qu’ils trouverent des sorcerots et aultres brouilleries par plusieurs fois a l’oreiller de leur enfant; mais que la mere du djt Becquet estant venue en la maison du djt de Garis, luy donna a boire de l’eau et la moitie d’un pain comme avoit este conseille de faire; depuis ne trouverent plus rien a l’oreiller du djt enfant; toutesfois pour eviter les djts sorcerots, ont toujours depuis couche leur enfant sur la paille; croit que ce mal leur ariva par leur moyen.

Mr Thomas de Ljsle depose que Thomas Brouart, qui demeure en sa maison, ayant appelle le fils de Collas Becquet, sorcier, il arriva qu’il fut un jour trouve au lict du djt Thomas grand nombre de vers, et les ayant le djt Sieur de Ljsle veus, les jugea comme une formioniere, tant estoyent mouvans et espais, et a peine en peuvent vuider le dit enfant, l’ayant mis en plusieurs endroits; qu’appres fut le djt enfant accueillis de poulx de telle maniere que quoyque luy changeassent des chemises et habits tous les jours ne l’en pouvoyent franchir; et qu’ayant le djt Thomas Brouart un corset tout neuf, fut tellement couvert de poulx qu’on n’auroit peu cognoistre le drap, et fut contraint le faire jetter parmy les choux; surquoy fait menacer aultre Massi de la batre si elle ne s’abstenoit d’ainsy traiter son enfant; qu’estant revenu trouva le djt corset parmis les choux denue de poulx, lesquels du depuis ont quitte le djt Brouart.

Jacques le Mesurier depose qu’il y a viron deux ou trois ans qu’il rencontra Collas Becquet et Perot Massi, quj avoyent du poisson, et d’aultant qu’ils lui debvoyent de l’argent, il voulut prendre de leur poisson a rabatre, mais ne luy en voulant bailler, eurent quelque dispute; sur quoy l’un des djts Becquet ou Massi le menacerent qu’il s’en repentiroit;