IV.

[A] The brygge wat3 brayde doun, & þe brode 3ate3
Vnbarred, & born open, vpon boþe halue;
[B] Þe burne blessed hym bilyue, & þe brede3 passed;
2072 Prayses þe porter, bifore þe prynce kneled,
Gef hym God & goud day, þat Gawayn he saue;
[C] & went on his way, with his wy3e one,
Þat schulde teche hym to tourne to þat tene place,
2076 Þer þe ruful race he schulde re-sayue. 
Þay bo3en bi bonkke3, þer bo3e3 ar bare,
[D] Þay clomben bi clyffe3, þer clenge3 þe colde;
Þe heuen wat3 vp halt, bot vgly þer vnder,
2080 Mist muged on þe mor, malt on þe mounte3,
[E] Vch hille hade a hatte, a myst-hakel huge;
Broke3 byled, & breke, bi bonkke3 aboute,
Schyre schaterande on schore3, þer þay doun schowued.
2084 Welawylle wat3 þe way, þer þay bi wod schulden, [Fol. 119.]
[F] Til hit wat3 sone sesoun, þat þe sunne ryses,
þat tyde;
[G] Þay were on a hille ful hy3e,
2088 Þe quyte snaw lay bisyde;
[H] Þe burne þat rod hym by
Bede his mayster abide.

[Sidenote A:  The gates are soon opened.] [Sidenote B:  The knight passes thereout,] [Sidenote C:  and goes on his way accompanied by his guide.] [Sidenote D:  They climb by cliffs,] [Sidenote E:  where each “hill had a hat and a mist-cloak,”] [Sidenote F:  until daylight.] [Sidenote G:  They were then on a “hill full high.”] [Sidenote H:  The servant bade his master abide, saying,]

V.

[A] “For I haf wonnen yow hider, wy3e, at þis tyme,
2092 & now nar 3e not fer fro þat note place,
[B] Þat 3e han spied & spuryed so specially after;
Bot I schal say yow for soþe, syþen I yow knowe,
& 3e ar a lede vpon lyue, þat I wel louy,
2096 Wolde 3e worch bi my wytte, 3e worþed þe better.
[C] Þe place þat 3e prece to, ful perelous is halden;
[D] Þer wone3 a wy3e in þat waste, þe worst vpon erþe;
For he is stiffe, & sturne, & to strike louies,
2100 & more he is þen any mon vpon myddelerde,
[E] & his body bigger þen þe best fowre. 
Þat ar in Arþure3 hous, Hestor[1] oþer oþer. 
He cheue3 þat chaunce at þe chapel grene;
2104 [F] Þer passes non bi þat place, so proude in his armes,
Þat he ne dynne3 hym to deþe, with dynt of his honde;
For he is a mon methles, & mercy non vses,
[G] For be hit chorle, oþer chaplayn, þat bi þe chapel rydes,
2108 Monk, oþer masse-prest, oþer any mon elles,
Hym þynk as queme hym to quelle, as quyk go hym seluen. 
For-þy I say þe as soþe as 3e in sadel sitte,
Com 3e þere, 3e be kylled, [I] may þe kny3t rede,
2112 Trawe 3e me þat trwely, þa3 3e had twenty lyues
to spende;
[H] He hat3 wonyd here ful 3ore,
On bent much baret bende,
2116 [I] A3ayn his dynte3 sore,
3e may not yow defende.”