[A] With care & wyth kyssyng he carppe3 hem tille,
1980 & fele þryuande þonkke3 he þrat hom to haue,
& þay 3elden hym a3ay[n] 3eply þat ilk;
[B] Þay bikende hym to Kryst, with ful colde sykynge3.
[C] Syþen fro þe meyny he menskly de-partes;
1984 Vche mon þat he mette, he made hem a þonke,
For his seruyse, & his solace, & his sere pyne,
Þat þay wyth busynes had ben, aboute hym to serue;
& vche segge as sore, to seuer with hym þere,
1988 As þay hade wonde worþyly with þat wlonk euer.
[D] Þen with ledes & ly3t he wat3 ladde to his chambre,
& blybely bro3t to his bedde, to be at his rest;
3if he ne slepe soundyly, say ne dar I,
1992 [E] For he hade muche on þe morn to mynne, 3if he wolde,
in þo3t;
[F] Let hym ly3e þere stille,
He hat3[1] nere þat he so3t,
1996 [G] & 3e wyl a whyle be stylle,
I schal telle yow how þay wro3t.

[Sidenote A:  kissing them sorrowfully.] [Sidenote B:  They commend him to Christ.] [Sidenote C:  He then departs, thanking each one he meets “for his service
  and solace.”]
[Sidenote D:  He retires to rest but sleeps but little,] [Sidenote E:  for much has he to think of on the morrow.] [Sidenote F:  Let him there lie still.] [Sidenote G:  Be still awhile, and I shall tell how they wrought.] [Footnote 1:  wat3 (?).]

[FYTTE the fourth.]

I.

[A] Now ne3e3 þe nw3ere, & þe ny3t passe3,
Þe day dryue3 to þe derk, as dry3tyn bidde3;
2000 [B] Bot wylde wedere3 of þe worlde wakned þeroute,
Clowdes kesten kenly þe colde to þe erþe,
Wyth ny3e[1] in-noghe of þe norþe, þe naked to tene;
[C] Þe snawe snitered ful snart, þat snayped þe wylde;
2004 Þe werbelande wynde wapped fro þe hy3e,
[D] & drof vche dale ful of dryftes ful grete. 
Þe leude lystened ful wel, þat le3 in his bedde,
[E] Þa3 he lowke3 his lidde3, ful lyttel he slepes;
2008 Bi vch kok þat crue, he knwe wel þe steuen. 
De-liuerly he dressed vp, er þe day sprenged, [Fol. 118.]
For þere wat3 ly3t of a lau[m]pe, þat lemed in his chambre;
[F] He called to his chamberlayn, þat cofly hym swared,
2012 & bede hym bryng hym his bruny, & his blonk sadel;
Þat oþer ferke3 hym vp, & feche3 hym his wede3,
& grayþe3 me sir Gawayn vpon a grett wyse. 
Fyrst he clad hym in his cloþe3, þe colde for to were;
2016 & syþen his oþer harnays, þat holdely wat3 keped,
Boþe his paunce, & his plate3, piked ful clene,
[G] Þe rynge3[2] rokked of þe roust, of his riche bruny;
& al wat3 fresch as vpon fyrst, & he wat3 fayn þenne
2020 to þonk;
He hade vpon vche pece,
Wypped ful wel & wlonk;
[H] Þe gayest in to Grece,
2024 Þe burne bede bryng his blonk.

[Sidenote A:  New Year’s Day approaches.] [Sidenote B:  The weather is stormy.] [Sidenote C:  Snow falls.] [Sidenote D:  The dales are full of drift.] [Sidenote E:  Gawayne in his bed hears each cock that crows.] [Sidenote F:  He calls for his chamberlain, and bids him bring him his
  armour.]
[Sidenote G:  Men knock off the rust from his rich habergeon.] [Sidenote H:  The knight then calls for his steed.] [Footnote 1:  nywe (?).] [Footnote 2:  rynke3 (?).]