1492 “Do way,” quod þat derf mon, “my dere, þat speche,
     [E] For þat durst I not do, lest I denayed were,
         If I were werned, I were wrang I-wysse, 3if I profered.” 
         “Ma fay,” quod þe mere wyf, “3e may not be werned,
1496 [F] 3e ar stif in-noghe to constrayne wyth strenkþe, 3if yow lyke3,
         3if any were so vilanous þat yow denaye[2] wolde.”
         “3e, be God,” quod Gawayn, “good is your speche,
         Bot þrete is vn-þryuande in þede þer I lende,
1500 [G] & vche gift þat is geuen not with goud wylle;
         I am at your comaundement, to kysse quen yow lyke3,
         3e may lach quen yow lyst, & leue quen yow þynkke3,
                 in space.”
1504 [H] Þe lady loute3 a-doun,
             & comlyly kysses his face,
             Much speche þay þer expoun,
             Of druryes greme & grace.

[Sidenote A:  The lady of the castle again visits Sir Gawayne.] [Sidenote B:  Softly she sits by his side,] [Sidenote C:  and tells the knight that he has forgotten what she taught him
  the day before.]
[Sidenote D:  “I taught you of kissing,” she says, “that becomes every
  knight.”]
[Sidenote E:  Gawayne says that he must not take that which is forbidden.] [Sidenote F:  He is told that he is strong enough to enforce it.] [Sidenote G:  The knight replies that every gift is worthless that is not
  given willingly.]
[Sidenote H:  The lady stoops down and kisses him.] [Footnote 1:  sayde (?).] [Footnote 2:  de vaye, in Ms.]

XV.

1508 [A] “I woled[1] wyt at yow, wy3e,” þat worþy þer sayde,
         “& yow wrathed not þer-wyth, what were þe skylle,
         Þat so 3ong & so 3epe, as 3e [ar] at þis tyme,
         So cortayse, so kny3tyly, as 3e ar knowen oute,
1512 [B] & of alle cheualry to chose, þe chef þyng a-losed,
         Is[2] þe lel layk of luf, þe lettrure of armes;
         F[or] to telle of þis tenelyng of þis trwe kny3te3,
         Hit is þe tytelet, token, & tyxt of her werkke3,
1516 How le[des] for her lele luf hor lyue3 han auntered,
         Endured for her drury dulful stounde3,
         & after wenged with her walour & voyded her care,
     [C] & bro3t blysse in-to boure, with bountees hor awen.
1520 & 3e ar kny3t com-lokest kyd of your elde,
         Your worde & your worchip walke3 ay quere, [Fol. 111b.]
         & I haf seten by your-self here sere twyes,
     [D] 3et herde I neuer of your hed helde no worde3
1524 Þat euer longed to luf, lasse ne more;
     [E] & 3e, þat ar so cortays & coynt of your hetes,
         Oghe to a 3onke þynk 3ern to schewe,
         & teche sum tokene3 of trweluf craftes.
1528 Why ar 3e lewed, þat alle þe los welde3,
         Oþer elles 3e demen me to dille, your dalyaunce to herken?
                 for schame! 
             I com hider sengel, & sitte,
1532 To lerne at yow sum game,
     [F] Dos, teche3 me of your wytte,
             Whil my lorde is fro hame.”