[A] And syþen by þe chymne in chamber þay seten.
[B] Wy3e3 þe walle wyn we3ed to hem oft,
1404 & efte in her bourdyng þay bayþen in þe morn,
To fylle þe same forwarde3 þat þay by-fore maden,
[C] Þat chaunce so bytyde3 hor cheuysaunce to chaunge,
What nwe3 so þay nome, at na3t quen þay metten
1408 Þay acorded of þe couenaunte3 byfore þe court alle;
Þe beuerage wat3 bro3t forth in bourde at þat tyme; [Fol. 110.]
[D] Þenne þay louelych le3ten leue at þe last,
Vche burne to his bedde busked bylyue.
1412 [E] Bi þat þe coke hade crowe3[1] & cakled bot þryse,
Þe lorde wat3 lopen of his bedde, [&] þe leude3 vch one,
So þat þe mete & þe masse wat3 metely delyuered;
Þe douthe dressed to þe wod, er any day sprenged,
1416 to chace;
[F] He3 with hunte & horne3,
Þur3 playne3 þay passe in space,
Vn-coupled among þo þorne3,
1420 Rache3 þat ran on race.

[Sidenote A:  By the hearth they sit.] [Sidenote B:  Wine is carried round.] [Sidenote C:  Again Sir Gawayne and his host renew their agreement.] [Sidenote D:  Then they take leave of each other and hasten to bed.] [Sidenote E:  Scarce had the cock cackled thrice when the lord was up.] [Sidenote F:  With his hunters and horns they pursue the chase.] [Footnote 1:  crowed (?).]

XII.

[A] Sone þay calle of a quest in aker syde,
Þe hunt re-hayted þe hounde3, þat hit fyrst mynged,
[B] Wylde worde3 hym warp wyth a wrast noyce;
1424 Þe hownde3 þat hit herde, hastid þider swyþe,
& fellen as fast to þe fuyt, fourty at ones;
Þenne such a glauerande glam of gedered rachche3
Ros, þat þe rochere3 rungen aboute;
1428 Huntere3 hem hardened with horne & wyth muthe.
[C] Þen al in a semble sweyed to-geder,
Bitwene a flosche in þat fryth, & a foo cragge;
In a knot, bi a clyffe, at þe kerre syde,
1432 Þer as þe rogh rocher vn-rydely wat3 fallen,
[Þay] ferden to þe fyndyng, & freke3 hem after;
[D] Þay vmbe-kesten þe knarre & þe knot boþe. 
Wy3e3, whyl þay wysten wel wyt inne hem hit were,
1436 Þe best þat þer breued wat3 wyth þe blod hounde3.
[E] Þenne þay beten on þe buske3, & bede hym vp ryse,
& he vnsoundyly out so3t segge3 ouer-þwert,
[F] On þe sellokest swyn swenged out þere,
1440 Long sythen for[1] þe sounder þat wi3t for-olde,
For he wat3 b[este &] bor alþer grattest,
[And eue]re quen he gronyed, þenne greued mony,
[G] For [þre a]t þe fyrst þrast he þry3t to þe erþe,
1444 & [sped hym] forth good sped, boute spyt more,
[Ande þay] halowed hyghe ful hy3e & hay! hay! cryed
Haden horne3 to mouþe heterly rechated; [Fol. 110b.]
[H] Mony wat3 þe myry mouthe of men & of hounde3,
1448 Þat buskke3 after þis bor, with bost & wyth noyse,
To quelle;
Ful oft he byde3 þe baye,
& mayme3 þe mute Inn-melle,
1452 [I] He hurte3 of þe hounde3, & þay
Ful 3omerly 3aule & 3elle.