792 Wyth mony luflych loupe, þat louked ful clene;
A better barbican þat burne blusched vpon neuer;
& innermore he be-helde þat halle ful hy3e,
[D] Towre telded bytwene trochet ful þik,
796 Fayre fylyole3 þat fy3ed, & ferlyly long,
[E] With coruon coprounes, craftyly sle3e;
Chalk whyt chymnees þer ches he in-no3e,
Vpon bastel roue3, þat blenked ful quyte;
800 So mony pynakle payntet wat3 poudred ay quere,
Among þe castel carnele3, clambred so þik,
Þat pared out of papure purely hit semed.
[F] Þe fre freke on þe fole hit fayr in-n[o]ghe þo3t,
804 If he my3t keuer to com þe cloyster wyth-inne,
To herber in þat hostel, whyl halyday lested
auinant;
[G] He calde, & sone þer com
808 A porter pure plesaunt,
On þe wal his ernd he nome,
& haylsed þe kny3t erraunt.

[Sidenote A:  The knight abides on the bank,] [Sidenote B:  and observes the “huge height,”] [Sidenote C:  with its battlements and watch towers.] [Sidenote D:  Bright and long were its round towers,] [Sidenote E:  with their well-made capitals.] [Sidenote F:  He thinks it fair enough if he might only come within the
  cloister.]
[Sidenote G:  He calls, and soon there comes a porter to know the knight’s
  errand.]

XIV.

[A] “Gode sir,” quod Gawan, “wolde3 þou go myn ernde,
812 To þe he3 lorde of þis hous, herber to craue?”
“3e, Peter,” quod þe porter, “& purely I trowe,[1] [Fol. 102.]
[B] Þat 3e be, wy3e, welcum to won quyle yow lyke3.” 
Þen 3ede þat wy3e a3ayn awyþe,
816 & folke frely hym wyth, to fonge þe kny3t;
[C] Þay let doun þe grete dra3t, & derely out 3eden,
& kneled doun on her knes vpon þe colde erþe,
To welcum þis ilk wy3, as worþy hom þo3t;
820 [D] Þay 3olden hym þe brode 3ate, 3arked vp wyde,
& he hem raysed rekenly, & rod ouer þe brygge;
Sere segge3 hym sesed by sadel, quel[2] he ly3t,
[E] & syþen stabeled his stede stif men in-no3e.
824 [F] Kny3te3 & swyere3 comen doun þenne,
For to bryng þis burne[3] wyth blys in-to halle;
[G] Quen he hef vp his helme, þer hi3ed in-noghe
For to hent hit at his honde, þe hende to seruen,
828 His bronde & his blasoun boþe þay token. 
Þen haylsed he ful hendly þo haþele3 vch one,
& mony proud mon þer presed, þat prynce to honour;
Alle hasped in his he3 wede to halle þay hym wonnen,
832 Þer fayre fyre vpon flet fersly brenned.
[H] Þenne þe lorde of þe lede loute3 fro his chambre,
For to mete wyth menske þe mon on þe flor;
He sayde, “3e ar welcum to welde as yow lyke3,
836 Þat here is, al is yowre awen, to haue at yowre wylle
& welde.” 
“Graunt mercy,” quod Gawayn,
“Þer Kryst hit yow for-3elde,”
840 [I] As freke3 þat semed fayn,
Ayþer oþer in arme3 con felde.