VI.

[A] Then þay schewed hym þe schelde, þat was of schyr goule3,
620 Wyth þe pentangel de-paynt of pure golde hwe3;
He brayde3 hit by þe baude-ryk, aboute þe hals kestes,
Þat bisemed þe segge semlyly fayre.
[B] & quy þe pentangel apende3 to þat prynce noble,
624 I am in tent yow to telle, þof tary hyt me schulde;
Hit is a syngne þat Salamon set sum-quyle,
In bytoknyng of trawþe, bi tytle þat hit habbe3,
For hit is a figure þat halde3 fyue poynte3, [Fol. 99b]
628 & vche lyne vmbe-lappe3 & louke3 in oþer,
[C] & ay quere hit is endele3,[1] & Englych hit callen
Ouer-al, as I here, þe endeles knot. 
For-þy hit acorde3 to þis kny3t, & to his cler arme3,
632 For ay faythful in fyue & sere fyue syþe3,
[D] Gawan wat3 for gode knawen, & as golde pured,
Voyded of vche vylany, wyth vertue3[2] ennourned
in mote;
636 For-þy þe pen-tangel nwe
He ber in schelde & cote,
[E] As tulk of tale most trwe,
& gentylest kny3t of lote.

[Sidenote A:  Then they show him his shield with the “pentangle” of pure
  gold.]
[Sidenote B:  The “pentangle” was devised by Solomon as a token of truth.] [Sidenote C:  It is called the endless knot] [Sidenote D:  It well becomes the good Sir Gawayne,] [Sidenote E:  a knight the truest of speech and the fairest of form.] [Footnote 1:  Ms emdele3.] [Footnote 2:  Ms verertue3]

VII.

640 [A] Fyrst he wat3 funden fautle3 in his fyue wytte3,
& efte fayled neuer þe freke in his fyue fyngres,
[B] & alle his afyaunce vpon folde wat3 in þe fyue wounde3
Þat Cryst ka3t on þe croys, as þe crede telle3;
644 & quere-so-euer þys mon in melly wat3 stad,
His þro þo3t wat3 in þat, þur3 alle oþer þynge3,
Þat alle his forsnes he fong at þe fyue ioye3,
Þat þe hende heuen quene had of hir chylde;
648 At þis cause þe kny3t comlyche hade
[C] In þe more half of his schelde hir ymage depaynted,
Þat quen he blusched þerto, his belde neuer payred. 
Þe fyrst[1] fyue þat I finde þat þe frek vsed,
652 Wat3 fraunchyse, & fela3schyp for-be[2] al þyng;
[D] His clannes & his cortaysye croked were neuer,
& pite, þat passe3 alle poynte3, þyse pure fyue
Were harder happed on þat haþel þen on any oþer.
656 Now alle þese fyue syþe3, forsoþe, were fetled on þis kny3t,
& vchone halched in oþer, þat non ende hade,
& fyched vpon fyue poynte3, þat fayld neuer,
Ne samned neuer in no syde, ne sundred nouþ[er],
660 With-outen ende at any noke [a]i quere fynde,
Where-euer þe gomen bygan, or glod to an ende.
[E] Þer-fore on his schene schelde schapen wat3 þe knot,
Þus alle wyth red golde vpon rede gowle3,
664 Þat is þe pure pentaungel wyth þe peple called, [Fol. 100]
with lore. 
Now grayþed is Gawan gay,
[F] & la3t his launce ry3t þore,
668 & gef hem alle goud day,
He wende for euer more.