Longinquum penetrare fretum, penetrare sorores
  Mecum vna Aonias, illic exordia gentis
  Prima nouae ad seros transmittere posse nepotes! 
  Sed me fata vetant, memoraturumque canora
  Inclyta facta tuba, ad clades miserabilis Istri
  Inuitum retrahunt.  His his me fata reseruent: 
  Non deerit vates, illo qui cantet in orbe
  Aut veteres populos, aut nostro incognita coelo
  Munera naturae; dum spreto Helicone manebit
  Ilia Aganippaeis sacrata Oxonia Musis. 
    Dum loquor in viridi festinant gramine Nymphae,
  Impediuntque comas lauro, et florentis oliuae
  Frondibus armantur, dominatricemque frequentes
  Oceani immensi longe venerantur Elisam. 
  Illa autem ad gelidum celsis de turribus amnem
  Prospicit, et iamiam Tamesino in patre tuetur
  Paulatim obliquis Gilebertum albescere velis. 
  Sic dea Peliaco spectasse e vertice Pallas
  Fertur Iasonios comites, ad Phasidos vndas
  Vix bene dum notis committere carbasa ventis. 
  Diva faue, nutuque tuo suscepta parari
  Vela iuua; Si sola geris dignissima totum
  Talibus auspicijs proferri sceptra per orbem. 
  Propterea quia sola tuos ita pace beasti
  Tranquilla populos, vt iam te principe possint
  Augere imperij fines.  Quia sola videris
  Quo niueae Charites, quo corpore Delia virgo
  Pingitur, et iusto si sit pro teste vetustas. 
  Talibus audimus quondam de matribus ortos
  Semideos homines:  tali est de sanguine magnus
  Siue Hector genitus, siue Hectore maior Achilles: 
  Duntaxat sine fraude vlla, sine crimine possint
  Vila tibi veterum conferri nomina matrum,
  Quae sexum factis superas, quae patribus audes,
  Nympha, dijs dignas laudes aequare Latinis. 
  Mentior infoelix, nisi sic in corpore virtus
  Lucet formoso, ceu quae preciosior auro est
  Gemma, tamen pariter placituro clauditur auro. 
  Mentior, et taceo, nisi sola audiris vbique
  Induperatorum timor aut amor, inter et omnes
  Securam requiem peragis tutissima casus: 
  Dum reliqui reges duro quasi carcere clausi
  Sollicitis lethi dapibus, plenoque fruuntur
  Terrificis monstris furtiua per ocia somno. 
  Mentior et taceo, solam nisi viuere ciues
  AEternum cupiunt:  quando nec verbere toruo,
  Nec caedis poenaeue thronum formtdine firmas: 
  Sed tibi tot meritis maiestas parta, et inermis
  Ad patulos residet custos clementia postes: 
  Vt quot pene rei iustum meruere tribunal,
  Tot veniam grato narrent sermone clientes. 
  Nec tamen admittis, nisi quod iustumque piumque
  Agnoscit probitas, et quae potes omnia, solis
  Legibus vsurpas cautas sanctissima vires. 
  Nec mala formidas:  si quidem quasi fune ligatur
  Consilio fortuna tibi:  Nullum impia terret
  In castris Bellona tuis:  Quin pronus adorat
  Gradivvs tua iussa pater, sequiturque vocantem
  Quacunque ingrederis grato victoria plausu.