Of the Roialme of Thurse and the Londes and Kyngdomes towardes the
  Septentrionale parties, in comynge down from the Lond of Cathay.

This lond of Cathay is in Asye the depe.  And aftre, on this half, is Asyetthe more.  The kyngdom of Cathay marchethe toward the west, unto the kyngdom of Tharse; the whiche was on of the kinges, that cam to presente our Lord in Betheleem.  And thei that ben of the lynage of that kyng, arn somme Cristene.  In Tharse, thei eten no flessche, ne thei drynken no wyn.  And on this half, towardes the west, is the kyngdom of Turquesten, that strecchethe him toward the west, to the kyngdom of Persie; and toward the Septrentionalle, to the kyngdom of Chorasme.  In the contre of Turquesten, ben but fewe gode cytees:  but the beste cytee of that lond highte Octorar.  There ben grete pastures; but fewe Coornes; and therfore, for the most partie, thei ben alle herdemen:  and thei lyzn in tentes, and thei drynken a maner ale, made of hony.

And aftre, on this half, is the kyngdom of Chorasme, that is a gode lond and a plentevous, with outen wyn.  And it hathe a desert toward the est, that lastethe more than an 100 iourneyes.  And the beste cytee of that contree is clept Chorasme.  And of that cytee, berethe the contree his name.  The folk of that contree ben hardy werryoures.  And on this half is the kyngdom of Comanye, where of the Comayns that dwelleden in Grece, somtyme weren chaced out.  This is on of the grettest kyngdomes of the world:  but it is not alle enhabyted.  For at on of the parties, there is so gret cold, that no man may dwelle there:  and in another partie, there is so grete hete, that no man may endure it.  And also there ben so many flyes, that no man may knowe on what syde he may turne him.  In that contree is but lytille arberye, ne trees that beren frute, ne othere.  Thei lyzn in tentes.  And thei brenen the dong of bestes for defaute of wode.

This kyngdom descendeth on this half toward us, and toward Pruysse, and toward Rossye.  And thorghe that contree rennethe the ryvere of Ethille, that is on of the grettest ryveres of the world.  And it fresethe so strongly alle zeres, that many tymes men han foughten upon the Ise with grete hostes, bothe parties on fote, and hire hors voyded for the tyme:  and what on hors and on fote, mo than 200000 persones on every syde.  And betweene that ryvere and the grete see ocean, that thei clepen the see maure, lyzn alle theise Roialmes.  And toward the hede benethe in that Roialme, is the mount Chotaz, that is the hiest mount of the world:  and it is betwene the see Maure and the see Caspy.  There is fulle streyt and dangerous passage, for to go toward Ynde.  And therfore Kyng Alysandre leet make there a strong cytee, that men clepen Alizandre, for to kepe the contree, that no man scholde passe with outen his leve.  And now men clepen that cytee, the Zate of Helle.  And the princypalle cytee of Comenye is clept Sarak, that is on of the 3 weyes for to go in to Ynde:  but be the weye, ne may not passe no gret multytude of peple, but zif it be in wyntre.  And that passage men clepen the Derbent.  The tother weye is for to go fro the citee of Turquesten, be Persie:  and be that weye, ben manye iourneyes be desert.  And the thridde weye is that comethe fro Comanye, and than to go be the grete see and be the kyngdom of Abchaz.