Hijs itaque visis describam saltem aliquas a prouincia Cathay in orientem terras Imperij Tartarorum. [Sidenote:  Cadilla Regio orientalior Cathay.  Angli nostri hanc bestiolam nuper viderunt in Persia.] Illic habetur regio Cadilla spaciosa multum, simul et speciosa:  crescunt namque in ea fructus ad quantitatem magnorum Cawardorum, in quibus inuenitur vna bestiola, in carne et sanguine ad formam agnelli absque lana, et manducatur totus fructus cum bestiola.  Sunt et alij plures diuersi fructus, quorum penes nos non est respectus nec vsus.  Nam et sunt ibi nonnullae speciales vites ferentes botros incredibiliter magnos, quorum vnum vix virilis vir valet in hasta portare.

Et deinde in meridiem per aliquas diaetas, potest perueniri ad primas Caspiae alpes, quae descendendo descendunt vsque ad Amazoniam, insulam mulierum, de qua tractatum est.  Inter has Alpes retinetur maxima multitudo Iudaeorum decem tribum Israel, per Dei voluntatem ita inclusa, vt in copiosa numerositate non possint a nostra parte exire, quamuis aliqui pauci nonnunquam sunt visi transisse.  Haberent autem competentem exitum circa insulam Amazoniae, sed illum diligenter regina obseruat.

[Sidenote:  Bacchariae Regnum vel Boghariae.] Porro de regione Cadilla in orientem venitur ad regnum Backariae, in qua mali et multum crudeles habitant homines, nec est securum itinerare per illam, quod ad modicam occasionem (si Deus non conseruaret) occiderent viatorem et manducarent. [Sidenote:  Arbor Lanifera.] Illic sunt arbores ferentes lanam velut ouium, ex qua texunt pannos ad vestimenta.  Hypocentauri sunt ibi pro media superiori parte in forma humana, et pro inferiori figura equorum, seu taurorum, venantes in terris, et piscantes in aquis quod comedunt, et super omnia carnes hominum, quos capere possunt. [Sidenote:  Gryphones, de quibus Paulus Venetae] Nec non et gryphi illic apparent pro media posteriori parte in forma leonis, pro anteriori in forma aquilae.  Sed sciatis, corpus magni gryphi maius esse octo leonibus de partibus istis.  Nam postquam equum, bouem vel hominem, etiam asinum occiderit, leuat et asportat pleno volatu:  tanquam cornua bouis aut vaccae sunt illi vngulae, de quibus etiam fieri solent ciphi ad bibendum, qui plurimum reputantur preciosi.  Fiunt quoque de pennis alarum eius arcus rigidi, et fortes ad iaciendum missilia et sagittas.  Ad istius regni Baccariae extremitates in Orientum finitur terra potestatis Grand Can:  Et iungitur ei terra potestatis magni Imperatoris Indiae, qui semper vocatur Praesbyter Ioannes.  Notandum, quoties per prouincias totius Imperij Grand Can, quicquam accidit, quod Imperatorem non oportet latere, confestim mittuntur per reges aut barones nuncij in dromedarijs aut equis, qui celerrime festinant ad certa hospitia, ad hoc ipsum, velut absque numero per imperium instituta:  Isque nuncius hospitio appropinquans, et cornu resonans, dum auditor paratur minicius alter, qui de manu suscipiens literas, per recentem dromedarium festinat ad aliud hospitium, et sic in breui tempore perferuntur rumores ad curia aures. [Sidenote:  Cursores, Chidibo Tartarice dicti.] Similique modo nuncij pedites permutantur de hospitio in hospitium, vt citius percipiatur negocium huius nuncij:  appellantur sua lingua Chidibo.