And alle maner thynge that apperteyneth to a knyght/ And his doughters he made hem to lerne. to sewe. to spynne. to laboure as well in wolle as in lynnen cloth/ And alle other werkis longynge to women And whan his frendes demanded wherfore he dyde so/ he answerd how well that he was lord & syre of alle the world/ yet wyste he not what shold befalle of his children and whether they shold falle or come to pouerte or noo/ and therfore yf they conne a good crafte they maye alleway lyue honestly/ The Quene ought to kepe her doughters in alle chastyte/ For we rede of many maydens that for theyr virginite haue ben made quenes/ For poule the historiagraph of the lombardes reherceth y’t ther was a duchesse named remonde whiche had .iii. sones & two doughters And hit happend that the kynge of hongrye cantanus assaylled a castell where she behelde her enemyes And amonge all other she sawe the kynge that he was a well faryng and goodly man/ Anone she was esprised and taken wyth his loue/ And that so sore/ that forthwith she sent to hym that she wold deliuere ouer the castell to hym yf he wold take her to his wyf and wedde her And he agreed therto/ and sware that he wold haue her to his wyf on that condicion/ whan than the kynge was in the castell/ his peple toke men and women and alle that they fonde/ her sones fledde from her/ of whom one was named Ermoaldus and was yongest/ and after was duc of boneuentan/ And syn kynge of the lumbardis.  And the two susters toke chikens And put hem vnder her armes next the flessh and bytwene her pappes/ that of the heete & chaffyng the flessh of the chikens stanke.  And whan so was that they of hongrye wold haue enforcid & defowled hem anone they felte the stenche and fledde away and so lefte hem sayng/ fy how these lombardes stynke/ and so they kept their virginite/ wherfore that one of them afterward was Quene of france And that other Quene of Aleman/ And hit happend than that the kynge Catanus toke acordynge to his promyse the duchesse/ and laye with her one night for to saue his oth And on the morn he made her comune unto alle the hongres/ And the thirde day after he dyde doo put a staf of tre fro the nether part of her/ thurgh her body vnto her throte or mouthe/ for be cause of the lust of her flessh she betrayed her cyte and sayd suche husbond/ suche wyf &c And this sufficeth of the Quene.

The thirde chapitre of the seconde tractate treteth of the alphyns her offices and maners.

The Alphyns ought to be made and formed in manere of Iuges syttynge in a chayer wyth a book open to fore their eyen/ And that is be cause that some causes ben crymynell/ And some ben cyuyle as aboute possessyons and other temporell thynges and trespaces/ And therfore ought to be two Iuges in the royame/ one in the black for the first cause/ And that other in whyte as for the seconde/ Theyr office is for to counceyll the kynge/ And to make by his comandements good lawes And to enforme alle the royame in good and vertuous maners/